المرأة التي كبدت facebook خساير بقرابة 50 مليار دولار اليوم، وأحرقت 6 مليار دولار من ثروة مارك زوكربيرج:

قبل ما نتكلم عن عالمة البيانات.. فيه أكتر من 3.5 مليار شخص حول العالم بيستخدموا فيسبوك وماسنجر وانستجرام وواتس اب.. فيسبوك وعائلة التطبيقات التابعة ليه دي خرجت من الخدمة على مستوى العالم لمدة 6 ساعات تقريبًا زي ما حضراتكم عارفين.. لو جينا نقيس الخساير اللي فيسبوك تكبدها من تعطيل الخدمة في الـ 6 ساعات دول.. هنشوف إجمالي الإيرادات لفيسبوك في 2020 واللي وصلت لـ 86 مليار دولار تقريبًا .. وبالتالي أحنا بنتكلم عن 163.5 ألف دولار خساير كل دقيقة.. يعني حوالي 60 مليون دولار خساير فيسبوك في الكام ساعة دول..

الضربة دي تعتبر ولا حاجة جنب الضربة بتاعت الست اللي في الصورة دي لفيسبوك ومارك زوكربيرج.. عالمة البيانات “فرانسيس هوجن” اللي كانت شغالة في فيسبوك قبل كده، بلغت عن مخالفات بالأدلة بخصوص فيسبوك مفادها باختصار شديد إن الشبكة حاطة الأرباح كأولوية عن الأمان بتاع المستخدمين.. ولسه هتدلي بشهادتها قدام الكونجرس بكرة الصبح.. بعد القنبلة اللي رمتها دي انخفضت أسهم فيسبوك أنهاردة بأكتر من 5% وبالتالي خسرت من قيمتها السوقية قرابة ال 50 مليار دولار..

ولما أسهم فيسبوك انخفضت بالدرجة الكبيرة دي، المؤسس والرئيس التنفيذي لفيسبوك “مارك زوكربيرج” اللي بيمتلك 14% من أسهم الشركة خسر أنهاردة بس 6 مليار دولار.. فيه معلومة مغلوطة بتلف دلوقتي إن خسارة زوكربيرج 6 مليار دولار بسبب انقطاع خدمة فيسبوك وده كلام غير صحيح.. الخسارة بسبب انخفاض أسهم فيسبوك أنهاردة الصبح بسبب القنبلة اللي فجرتها واحدة من داخل مطبخ فيسبوك.. علشان يصبح اليوم الإثنين بمثابة الإثنين الأسود لفيسبوك ومارك زوكربيرج..